भटके-विमुक्त समाजाने शिक्षण आणि हक्कांसाठी संघटित व्हावे – मनिषाताई घुले
नवचेतना सर्वांगीण विकास केंद्रातर्फे धनेगाव, येळंब आणि राडीतांडा येथे विविध जनजागृती कार्यक्रम.
केज !प्रतिनिधी
नवचेतना सर्वांगीण विकास केंद्राच्या वतीने भटके-विमुक्त दिनानिमित्त धनेगाव, येळंब आणि राडीतांडा येथे विविध जनजागृती व सांस्कृतिक कार्यक्रमांचे आयोजन करण्यात आले. या कार्यक्रमांच्या माध्यमातून भटके-विमुक्त समाजातील नागरिकांना त्यांच्या इतिहासाची, हक्कांची आणि अधिकारांची जाणीव करून देत शिक्षण व समाजाच्या सर्वांगीण विकासासाठी संघटित होण्याचे आवाहन करण्यात आले.
कार्यक्रमात भटके-विमुक्त समाजाच्या ऐतिहासिक संघर्षाविषयी माहिती देण्यात आली. ब्रिटिश सरकारने १८७१ मध्ये लागू केलेल्या गुन्हेगार जमाती कायद्यांतर्गत (Criminal Tribes Act) अनेक भटक्या समुदायांवर अन्यायकारक निर्बंध लादले होते. भारताला स्वातंत्र्य मिळाल्यानंतर ३१ ऑगस्ट १९५२ रोजी या समुदायांना कायद्याच्या जाचक बंधनांतून मुक्त करण्यात आले. या ऐतिहासिक घटनेच्या स्मरणार्थ दरवर्षी ३१ ऑगस्ट हा दिवस ‘भटके-विमुक्त दिन’ म्हणून साजरा केला जातो, अशी माहिती यावेळी देण्यात आली.
कार्यक्रमाचे विशेष आकर्षण म्हणजे समाजबांधवांचा पारंपरिक वेशभूषेतील उत्स्फूर्त सहभाग. पारंपरिक गीते, लोकवाद्ये आणि नृत्यांच्या सादरीकरणातून भटके-विमुक्त समाजाची समृद्ध संस्कृती आणि लोककला उपस्थितांसमोर सादर करण्यात आली. पारंपरिक वेशभूषा, लोकवाद्यांचा नाद आणि आकर्षक नृत्यांनी कार्यक्रमस्थळी उत्साहपूर्ण वातावरण निर्माण केले.
भटके-विमुक्त समाजातील नागरिकांनी आपल्या हक्क व अधिकारांबाबत जागरूक होणे, मुलांना शिक्षणाच्या मुख्य प्रवाहात आणणे आणि समाजाच्या विकासासाठी सामूहिक प्रयत्न करणे आवश्यक असल्याचे यावेळी सांगण्यात आले.
“हक्कांची जाणीव, शिक्षणाची साथ आणि एकजुटीच्या माध्यमातूनच भटके-विमुक्त समाजाचा सर्वांगीण विकास शक्य आहे. समाजातील प्रत्येक मुलाला शिक्षणाची संधी मिळावी आणि प्रत्येक कुटुंबाने आपल्या अधिकारांसाठी जागरूक व्हावे,” असा संदेश संस्थेच्या प्रमुख मनिषाताई घुले यांनी दिला.
कार्यक्रमांना संबंधित गावांतील सरपंच, ग्रामपंचायत सदस्य, महिला, पुरुष आणि मुलांनी उत्स्फूर्त प्रतिसाद दिला. कार्यक्रमांच्या यशस्वी आयोजनासाठी नवचेतना सर्वांगीण विकास केंद्राच्या सर्व कार्यकर्त्यांनी विशेष परिश्रम घेतले.
Leave a Reply